साहित्यपोस्ट
नेपाली भाषा र साहित्यको सम्पूर्ण पत्रिका

जसरी लाग्छ घाम चर्की छायाँ उस्तै हुन्छ !

Chovar Blues Mobile Size

मुक्तक – १

नदीसँगै सागर भेट्न बग्दोरहिछ पानी
बेग बनी चट्टान रेट्न बग्दोरहिछ पानी
तरानी हो पानी हेर पानी नै हो जीवन
आँसु झर्दै पीर मेट्न बग्दोरहिछ पानी !

मुक्तक – २

करोडौं फूल फुले पनि बोट एउटै हुन्छ
रङ्क रैती जो भए नि भोट एउटै हुन्छ
पीडा दिने घाउ हुन्न दुखाई हुन्छ हजुर
तन मन जहाँ लागे नि चोट एउटै हुन्छ !

मुक्तक – ३

कसरी मिल्थ्यो लय मनको सबैसँग हजुर
किन चल्थ्यो अहं तनको सबैसँग हजुर
फरक मास फरक फुल्छन् फूलहरू पनि
कहाँ टिक्थ्यो रनक धनको सबैसँग हजुर !

sagarmani mobile size

मुक्तक – ४

दरिलो भए बायाँ पाङ्ग्रो दायाँ उस्तै हुन्छ
जसरी लाग्छ घाम चर्की छायाँ उस्तै हुन्छ
शङ्काले नै टुट्छ हेर जीवनको तार पनि
जति गाढा मनको नाता माया उस्तै हुन्छ !

मुक्तक – ५

छड्किएपछि नतारी त माड किन सुक्थ्यो
स्वाट्ट नपारी डबका त जाँड किन सुक्थ्यो
कयौं कुरा त अप्रिय हुन्छन् कठोर बन्नुपर्छ
चिरफार गरी नफाले त गाँण किन सुक्थ्यो ?

मुक्तक – ६

भरिनुको खुसी कस्तो झुसिएको भाँडो हेर
अग्लिनुको अर्थ के हो चुलिएको डाँडो हेर
जीवनजस्तै छ प्रकृति पनि हेरी पाठ सिक
मित्रताको गर्व कति फूलसँगैको काँडो हेर !

मुक्तक – ७

पर्खाइको स्वाद के हो बल्छी थाप्ने टाँगो हेर
गुमाउनुको मोल के हो फल लाग्ने हाँगो हेर
जिन्दगी नै बोझ बनाई जिउँछन् कायरहरू
सहासको अर्थ के हो झर्झर झर्ने छाँगो हेर !

मुक्तक – ८

प्यासको पछि लाग्दालाग्दै आज भोगी बन्यौ
अहंकारले जलेर भित्रभित्रै आज रोगी बन्यौ
कसले रचायो भन दौडधुपको नटुङ्गिने खेल
धनको पछि हिँड्दाहिँड्दै आज जोगी बन्यौ !

मुक्तक – ९

बाहिर एउटा भित्रभित्रै हजार लीला हुन्छन् हेर
मुखाँ राम मस्तिष्कमा सेक्सी फीला हुन्छन् हेर
कति गर्छौ भ्रमको रोपाइँ तथ्यसँग प्रमाण हुन्छ
छोप्ने पर्दा खसेपछि ईश्वर पनि गीला हुन्छन् हेर !

मुक्तक – १०

कसरी भरमा पर्नु हजुर मुखिया नै जाली भा’छ
के को लाली भर्नु हजुर अनुहार नै काली भा’छ
सकुनीहरूको बैठकमा पासाको नै खेला चल्छ
कसको विश्वास गर्नु हजुर बगरे नै माली भा’छ !

प्रथा

प्रतिक्रिया
Loading...