राजु प्रधान “हिमांशु” (खरसाङ)

(१)

तिम्रो कामको कदर हुन्छ भने खुसी छु
तिम्रो दामको कदर हुन्छ भने खुसी छु

रूपको मूल्य के कति छ थाहा छैन मलाई
तिम्रो चामको कदर हुन्छ भने खुसी छु

लानु त केही छैन दुई दिने यो जीवनबाट
तिम्रो नामको कदर हुन्छ भने खुसी छु

अँध्यारो लाग्छ दिन पनि अचेल यतातिर
तिम्रो घामको कदर हुन्छ भने खुसी छु

पूजामा अविश्वास गर्नेले गरोस् न बेस्सरी
तिम्रो रामको कदर हुन्छ भने खुसी छु

(२)

आगोको ज्वालामा भिजुँभिजुँ लाग्दै छ
बर्खाको झरीमा जलुँजलुँ लाग्दै छ

यादको बादल फाटेर आँसुको सुनामी उर्लन्छ
उतप्त लाभामा बगुँबगुँ लाग्दै छ

घातले पोलेको छातीभित्र आगो जल्छ हुरुरुरु
हिउँको भुङ्ग्रोमा पसुँपसुँ लाग्दै छ

घोच्नसम्म घोचेपछि के दुख्थ्यो र मनलाई
काँड़ाको काखमा बसुँबसुँ लाग्दै छ

दुई दिनको जीवनमा हाँसिराख भन्छन् सबै
मायाको डोरीमा फसुँफसुँ लाग्दै छ

डाउनहिल, खरसाङ, भारत ।