साहित्यपोस्ट
नेपाली भाषा र साहित्यको सम्पूर्ण पत्रिका

प्रकाश कुइँकेलका गजल

प्रकाश कुइँकेल (असम)

 

गजल १

ख्याल आउँछ योबेलामा अनेकौँ सम्झना आउँछ,

काम बिग्रिएपछि मात्रै मान्छेलाई चेतना आउँछ ।

 

बिहान देखेको सपना साँचो हुन्छ भन्नुहुन्छ तपाईँ,

मलाई मरेका मेरा बा फर्किएको सपना आउँछ ।

 

मैले तिम्रो माग पूरा गर्नैपर्छ दिदी तिमीले माग राख्यौ,

मेरो मर्गौला बेच्दा तिमीलाई चाहिएजति गहना आउँछ ।

 

तपाईँको नजरमा मन्दिरभित्र भगवान् पाइएला !

मलाई आमाको चिहानमा भगवानको भावना आउँछ ।

 

प्रिय. ! तिमी महलमा बस्ने अनि म झुपडीमा बस्ने,

सम्झ सुनसँग पित्तलको कसरी पो तुलना आउँछ ?

 

गजल २

जिन्दगी कहिले पानी बन्छ कहिले चट्टान बन्छ,

सोच्नुहोस् ! प्रत्येक रातपछि पुनः बिहान बन्छ ।

 

आमा…! हामी किन सधैँ अभावमा बाँच्नुपरेको ?

छोरा ! झुपडीमा आएको खुसी पनि तुफान बन्छ ।

 

यो जाल र झेलले भरिएको संसार रहेछ महाशय !

यहाँ ढाँट्नेहरूको मात्रै मान बन्छ पहिचान बन्छ ।

 

गरिबहरू पैदल यात्रामै अस्पतालसम्म पुग्नुपर्ने !

धनी बोक्नलाई अनेकौँ साधन बन्छ यान बन्छ ।

 

हावाले बत्तीलाई किन चाँडै निभाउँछ महोदय ?

बाबु ! हावाले आगो खान्छ र त ऊ जवान बन्छ ।

प्रतिक्रिया
Loading...