अर्जुन कार्कीका गजल

अर्जुन कार्की (असम)

गजल १

नयाँ बिहानीसँगै खुल्नेछन् घरघरका कारागारहरू,

हट्नेछन् अवश्य कुनै दिन सबै असती बिमारहरू ।

रोजगारी पाउनेछन् फेरि पहिले झैँ युवाहरूले,

चल्नेछ उद्योगधन्दा खुल्नेछन् वाणिज्य व्यापारहरू ।

खुल्ला पंक्षी झैँ हुनेछन् मानिसहरू फेरि उसैगरी,

घुम्नेछन् देश विदेश हट्नेछ सबै छेकबारहरू ।

आशा छ, आउनेछन् फर्केर दिनहरू पहिलेको झैँ

मनाइने छ दशैँ र तिहार रङ्गिनेछन् निधारहरू ।

फर्की आउनेछन् उज्याला ती दिनहरू खुसीयालीका,

बज्नेछन सङ्गीतका रमाइला मीठा मीठा झन्काहरू ।

गजल २

माइती धर्म निभाउन नपाएको धेरै भयो,

तिजमा चेलीसँगै दर नखाएको धेरै भयो ।

दर खाई चेली माइती रमाउँदै एकैसाथ,

रमाइलो तिज गीत नगाएको धेरै भयो ।

पापी पेट पाल्नलाई सबैदेखि टाढा भयो,

बाध्यताले गर्दा घर नआएको धेरै भयो ।

बूढा भाका बाबा आमा भिजेको होला घरभित्रै,

चुह्यो होला छानो पनि नछाएको धेरै भयो ।

सम्झिएर यिनै कुरा मुटु पोल्छ घरि घरि

जागै बस्छु राती निद्रा नलाएको धेरै भयो ।