साहित्यपोस्ट
नेपाली भाषा र साहित्यको सम्पूर्ण पत्रिका

दिव्य गिरीको गजल

 

दिव्य गिरी

यहाँ दुधले नुहाएर आएको कोही छैन
मंगल धुन सुनाएर आएको कोही छैन ।

आज चारैतिर असुरक्षाको हाहाकार छ
शान्ति-गीत गुन्गुनाएर आएको कोही छैन ।

हरबखत अनुहारमा उदासीपन छ
आँखामा गुराँस फुलाएर आएको कोही छैन ।

जाली, झेली र कपटीको घेरोमा पर्नुभयो
कुत्सित स्वार्थ भुलाएर आएको कोही छैन ।

सत्ताको स्वादमा रमाउने धेरैधेरै भए
देशको निम्ति जुर्मुराएर आएको कोही छैन ।

तिमी भन्छौ, राम हराम हुँदैछ हिजोआज
प्यूँदै नपिई ढुन्मुनाएर आएको कोही छैन ।

महालक्ष्मी नगरपालिका, वडा नं. ५
टीकाथली, ललितपुर

लेखक परिचय

त्रिभुवन विश्वविद्यालयको आर्थिक विकास तथा प्रशासन अनुसन्धान केन्द्रबाट अवकाशप्राप्त दिव्य गिरी ललितपुरको इमाडोलमा जन्मनु भएको हो । २०३२ सालमा नै गुलाफ रहेछ कागजको कविता प्रकाशन गरी लेखनीमा प्रवेश गर्नु भएपछि उहाँका आठ वटा कृति प्रकाशित भइसकेका छन् । उहाँका कङ्काल बस्ती (मुक्तकसङ्ग्रह), २०३८, सागर लहर किनार (गजलसङ्ग्रह), २०५४, धुनी तापेर (हाइकुसङ्ग्रह), २०६१, अनामिका (कथासङ्ग्रह), २०६१, स्वप्निल शिविर (मुक्तकसङ्ग्रह), २०६४, हराएका इलाकाहरू (कवितासङ्ग्रह), २०७३, भेडीगोठ र भेडो (लघुकथाकवितासङ्ग्रह), २०७३, सम्झनामा शकुन्तला (सस्मरण), २०७७ प्रकाशित भइसकेका छन् भने केही पुस्तक प्रकाशन हुने क्रममा रहेका छन् । उहाँले २०३७ सालदेखि २०३९ सालसम्म सौरभ साहित्यिक
साहित्यिक द्वैमासिकको सहसम्पादनसमेत गर्नुभएको थियो ।

उहाँले विशिष्ट कथा सम्मान (‘रचना’ रजतजयन्ती कथाअङ्कमा समावेश गरिएको पहिचान शिर्षकको कथाको निम्ति विशिष्ट कथा सम्मान प्राप्त भएको ।), उत्कृष्ट मुक्तकको लागि वैजयन्ती स्रष्टा सम्मान, काठमाडौं, २०७२, गोरखापत्र संस्थान, काठमाडौंद्वारा २०७४ मा आयोजित राष्ट्रिय लघुकथा प्रतियोगितामा प्रथम स्थान हासिल गर्नुभएको थियो ।
उहाँ अन्तरराष्ट्रिय नेपाली साहित्य समाज, नेपाल च्याप्टरको उपाध्यक्ष हुनुहुन्छ भने नेपाल मुक्तक प्रतिष्ठान, काठमाडौंको सदस्य हुनुहुन्छ । त्यस्तै नेपाल स्रष्टा समाज, काठमाडौंको उहाँ आजीवन सदस्य हुनुहुन्छ ।

प्रतिक्रिया
Loading...