राजु “हिमांशु” (खरसाङ)

नङ र मासुको मिलनलाई जलाउनेहरू कति छन् कति यहाँ
मुखमा रामराम मनमा छुरा चलाउनेहरू कति छन् कति यहाँ

बुझ्नै नसकिने चरित्रहरू विचित्र र रङ्गीन देखिन्छन् अचेल
छेउमा बसी मायाको मिनार ढलाउनेहरू कति छन् कति यहाँ

मान-मर्यादाभन्दा रुपियाँको होड चल्छ धेरै अचेल चारैतिर
कदर मूल्य नबुझी टुप्पाबाट पलाउनेहरू कति छन् कति यहाँ

स्वाङ र स्वार्थको पोको बोकी दगुर्छन् विचारहरू जताततै
कूटनीतिको आगामा सत्य गलाउनेहरू कति छन् कति यहाँ

रगत-पसिनाको दाम केही छैन अचेल चाप्लुसीको बजारमा
चेपाइले योग्यलाई किनार लगाउनेहरू कति छन् कति यहाँ

—