आँगनीछेउ फूल सयपत्रीको, अझै उस्तै छ बाबु यहाँ
दैला माथि सप्तरङ्गी टिको, अझै उस्तै छ बाबु यहाँ

सुकेको छैन मखमली माला, बगिरहेछन् तेलका धारा
तिमीप्रति प्यार दिदी बैनीको, अझै उस्तै छ बाबु यहाँ

जलिरहेछ बर्षौ देखि अटुट, तिम्रै नामको दीर्घायु दीप
झलमल उजेलो दीप बत्तीको, अझै उस्तै छ बाबु यहाँ

गाउँदै हिँड्थ्यौँ देउसी र भैलौ, खेल्थ्यौँ पिङ्ग सँगसँगै
माया र उमङ्ग साथी संगीको, अझै उस्तै छ बाबु यहाँ

फुटाए पनि दुःख ओखर सँगै, छुटाए पनि यो समयले
जस्तो थियो सन्सार दुःखीको, अझै उस्तै छ बाबु यहाँ

उडेर चरी टाढा गएपनि, जन्मघर सँग बिरानो भएपनि
दलिन माथि गुँड गौँथलीको, अझै उस्तै छ बाबु यहाँ !