आऊ हामीलाई पनि सिकाइ देऊ कला भुलाइ जाने
भोटे ताल्चा दिलमा लगाई धोकाले बाटो खुलाइ जाने

सुनको त हैन मायाको तस्करी गर्न पनि सिक्नु छ
जान्नु नै पर्नेछ तस्करलाई मायाजालमा थुनाइ जाने

मायाको त केन्द्र बन्नु छ अनि सबैको आँखाको नानी
सिक्नु छ मायाको राजनीतिमा नेतृत्व चुनाइ जाने

उदेक लाग्दो हैन सुनी रहुँ लाग्ने भाषण गर्नु छ
मायाको भेलामा घण्टौँ मधुर भाषण सुनाइ जाने

कोर्नु छ झण्डा मायाको सबैलाई सर्व स्विकार्य हुने
घर घर मायाको झण्डा होस् यस्तो झण्डा बुनाइ जाने

सिद्धिचरण नगरपालिका-२,

ठूलाछाप-निशंखे, ओखलढुङ्गा