तिमी नाचिरह्यौ म तिम्रो चालमा हराएँ
उर्ली बहने तिम्रै केशको छालमा हराएँ

गीतसँगै संगीतसँगै म तिम्रै आँखाभरि
झिमझिम झिम्कने परेली तालमा हराएँ

डुबेँ म हरेक चालमा, घुमेँ म घुमाइसँगै
नागिनसरि त्यो तिम्रो जिउडालमा हराएँ

नजर मिलायौ तिमीले नसा पिलाएसरि
कठै म तिम्रै मायाको इन्द्रजालमा हराएँ

भुलायौ सदा तिमीले, पल पलमा हराएँ
आज म मेरो आफ्नै हरेक हालमा हराएँ

——————-

ठूलीपोखरी, कुश्मा, पर्वत
हालः टोरोन्टो, क्यानडा