तिमी अलिकति मुस्कुराएर त हेर, संसार फरक देखिन्छ
आँखामा आँखा जुधाएर त हेर संसार फरक देखिन्छ

त्यो छिमेकी दुस्मन ठान्यौ, दुस्मनकै नजरले हेर्यौ
सहयोग लागि गुहारेर त हेर, संसार फरक देखिन्छ

तिमी सधैँ सुकिला आँखाबाट किन हेर्छौ सरकार ?
कैलेकाहीँ आँखा रसाएर त हेर, संसार फरक देखिन्छ

आँखा उघारेर कति हेर्छौं मात्र बाटोका दुःखीहरूलाई
एकफेर मन उघारेर त हेर, संसार फरक देखिन्छ

ती दुःखका चोट बल्झाउँदै दुःख मान्दै रुन्छौ किन ?
सुखका पल सम्झिएर त हेर, संसार फरक देखिन्छ ।

भोजपुर नगरपालिका -१२, टक्सार, पैयापानी