हो, लोकतन्त्र नेपालमा छ भन्नुस्
ल्याउने मान्छे कुन देश गा’छ भन्नुस्

सिधा रुख पहिला काटिन्छ नभन्नुस्
बन्चरो पनि त सिधा छ भन्नुस्

उही ड्याङको मुला रैछ सोच्नुभन्दा
यी सबै ड्याङमा मुला छ भन्नुस्

तपाईंको चस्मा उता फर्केको रैछ
तपाईंको आँखा कता छ भन्नुस्

दूध छैन रातो चिया खाने, नसोध्नु
ह्या मलाई ग्यास्ट्रिक भा छ भन्नुस्

त्यो विधवाको पसल रैछ थाहा भयो
त्यहाँ सिन्दुरको बट्टा छ भन्नुस्

किसानको बाली पहेँलो हुन थाल्यो
रासायनिक मल कस्ले खा’छ भन्नुस्

जन्माउनुस्, हुर्काउनुस् अनि रुनुस् बुढेसकालमा
छिमेकीलाई छोरी औरिका छ भन्नुस्

सरकारले खुट्टा काटेको समाचार नभन्नू
सरकार बैशाखी बाँड्या छ भन्नुस्

छोरो चोर छ, डाका छ भन्दा लाज होला
बा ! मेरो छोरो नेता छ भन्नुस् ।

दुधौली-1, सिन्धुली