निर्मल आग्रह

७. 

निर्मल आग्रह

सयपत्रीका केही फूलहरू
फुलेका छन्
गुलाबका क्यारीहरू माझ !

गुलाबले अलिक होच्याएर सोध्छः
“तिमी यहॉं कसरी ??”

स्वाभिमानी सयपत्रीको ओठे जवाब
यस्तो थियो-
“वसन्तलाई सोध !”

८.

मेरा
केहि सहोदरहरूको दावा छ
उनीहरू वर्तमानका हुन्
किनकि उनीहरूलाई प्याज मनपर्छ !

उनीहरूलाई यति पनि ज्ञान छैन
कि एक बहुरूपियाले कसरी उनीहरूलाई
भविष्यको सपना देखाएर
अतितमा पछारिदिन सक्छ
र
उनीहरूले पुनः
कन्दमूल, तरूल खोज्नु पर्छ ।

९.

याद के हो ?

चियामा चिनी
र
तिहुनमा नूनको अनुपस्थिति हो याद आउनु !

जसरी
मुस्कान र रोदन त्यति नै नजिक हुन्छन्
जति टाढा ओठदेखि आँखा !

दुई एक साथ हुँदा-हुँदै पनि
बीचमा दूरी याद गर्नलाई एउटा शर्त हो !

याद र रात साक्खे दिदी-बहिनी हुन्
जब पनि आउँछन्, सँगसँगै आउँछन् ।

निर्मल आग्रह
सिलगड़ी, भारत