मञ्जु मञ्जुभाषिणी

कविताः बिदा

जीवनको मोडमा भेटें तिमीलाई
अनि
कोहिनुर सम्झेर उठाएँ ।

आज पनि मेरो नजरमा
तिमी कोहिनुर नै हौ
सधैँ रहनेछौ
तर
यही मेरो दोष हो भने
म निर्दोष छु भनेर
असमर्थ छु
प्रमाण पेश गर्न ।

सक्छु
तिमीबाट टाढा हुन
बस
अन्तिम इच्छा हो मेरो
कुनै पल
शङ्काको बादल हटाएर
नचुहाउनू
आँसुका थोपा तपतप
विछोडमा
किनकी
तिम्रो विजय हेर्न
जन्मेको मान्छे हुँ म
तिम्रो हार मलाई
स्वीकार्य छैन
मेरो मृत्युपछि पनि ।

प्रिय मान्छे
मेरो अनुरोध छ
मलाई हाँसेर बिदा देऊ।