खिम लाल श्रेष्ठ

हार र जीतको बीचमा
म त मधुरो रेखा देख्छु साथी
उकालो चढ्नु र ओरालो झर्नुमा
म त एउटा बिन्दु देख्छु साथी

जब मझधारमा तिमी पुग्छौ
वारि र पारि सापेक्षित हुन्छन्
एक पाइला पर सरे
पारि पुग्छौ
एक पाइला वर सरे
वारि आइपुग्छौ
तिमीलाई मझधारसम्म
यत्नका साथ काँध थापेर पुर्याउँछन्
तिम्रो हरेक पाइलामा धुरु धुरु रुन्छन्

हार र जीतको बीचमा
म त मधुरो रेखा देख्छु साथी
उकालो चढ्नु र ओरालो झर्नुमा
म त एउटा बिन्दु देख्छु साथी

आफ्नो छिनोफानो आफै गर्छौ
जित्यौं जित्यौं हार सबै निमिट्यान्न भो भन्छौ
असल र खराबको पातलो झिल्लीले
तिमीलाई झुक्याउँछ

हार र जीतको बीचमा
म त मधुरो रेखा देख्छु साथी
उकालो चढ्नु र ओरालो झर्नुमा
म त एउटा बिन्दु देख्छु साथी ।

डा. हिम लाल श्रेष्ठ
अश्राङ्ग, गोरखा
हाल – कटुन्जे, भक्तपुर