साहित्यपोस्ट
नेपाली भाषा र साहित्यको सम्पूर्ण पत्रिका

ओ अमेरिका, दे आर ब्रिदिङ

सुशीला अधिकारी

Chovar Blues Mobile Size

सेतो घुँडाले, कालो घिच्रोमा
रोमाञ्चक अन्त्यको मसाज
कस्तो लाग्यो त ?
कालो रङले, सेता घाममा
दिउँसै कालो छरिदिँदा
कस्तो लाग्यो त ?

रातो मटु कसक्क कस्सिएर
कालो नाकबाट फोक्सोले फालेको
सेतो हावा फाल्न सकिनँ भन्दा
कस्तो लाग्यो त ?

इतिहासमै थोरै, त्यो पनि निकैपछि
बाँधिएका हात–खट्टा
च्यापिएका काँध, थिचिएका टाउका
‘ब्लाइण्ड फोल्ड’ फालेर
उछिट्टिएका आँखाहरुका
निख्खर सेता चमक
कस्तो लाग्यो त ?

पिपरस्प्रे, टियर ग्याँस
रबर गोली, मनलागी धरपकड
खट्टाले सडक नाप्नै नपाउने आदेश
सेता घरमा बसेर धम्काउँदा पनि
कालै बंकरमा लुक्नु पर्दा
कस्तो लाग्यो त ?

ककेसियन प्रजाति भएकैले
सस्तै पाएका
सेता बाहिरी रङ बोकेर
संसार आफ्नै खट्टामुनि
कुल्चिएर राख्ने
तिम्रा थिचोमिचोहरु
चम्किला, सेता आवाज भरेर
तिम्रा घिच्रोमा पोखिँदै
छाती ढाक्दा
तिमीले ‘आई कान्ट ब्रिद’
भन्ने पूर्ण वाक्य
मिनियापोलिसको काले
‘जर्ज फ्लोइड’ लाई सनाउँदा
कस्तो लाग्यो त ?

सास फेर्न निषेधाज्ञा
गरेका सहरमा फोक्सोहरु
सडकमा निस्केर
सेतो जलप लाएको सहरमा
ठूलो ठूलो आवाजमा
दे आर ब्रिदिङ,
कस्तो लाग्यो त ?

sagarmani mobile size

(अमेरिकामा प्रहरीद्वारा काला नागरिकको हत्यापछि सडकमा उत्रिएको विरोधपछि प्रवासबाट एउटा कविता ।)

कवि प्रवासी नेपाली हुन्

प्रतिक्रिया
Loading...