नवराज कार्की

हिजो बजारमा भेटियो एउटा साथी
अर्थात मेरो सहपाठी
उसले मलाई नानाभाति सोध्यो
उसले मेरो कपालमा
मेरै उमेर खोज्यो
हेर्यो निकै नियालेर
बोल्यो लय हालेर
हैन तँ कति भएस हँ साथी ?
काटिस होला नि साठी !
मैले भनें भए भर्खर पैतीस
उसले भन्यो ईस
हैन तँ ता उहिल्यै भाथिस त पैंतीस
मैले भनें हो त के आश्चर्य भो त ?
तैले कक्षा दोहोर्याएको थिस
मैले उमेर दोहोर्याएँ
दायाँ बायाँ केही नहेरी भए दुईचोटी पैंतीस
किन गर्छस् रिस ?
तेरो साथी मैँ थिएँ
मेरो साथी तैँ थिस
हुने हैन त फेरि
सधैँ पैंतीसको पैंतीस ?
खुबै हाँस्यौं दुबै
उमेर सम्झिदै सम्झिदै
हत्तेरी ! भै यो त सत्तरी
दुई दुई चोटी पैंतीस
दश थपेर पनि अझै तीन बीस ?