साहित्यपोस्ट
नेपाली भाषा र साहित्यको सम्पूर्ण पत्रिका

कविता

शिव पौडेल

ए नेपाली
तिमीले कहिले पत्यायौ
गधालाई नुहाइदिए गाई हुन्छ

तिमी अनिष्टकारीलाई
नुहाँउदै हिंडेका छौ रे
गधा त गधै हो उसको कोष कोषमा
गधापन छ भारी बोक्ने डिएनए कर्म छ

bahulako diary small and inside post

कर्म नै उसको त्यस्तै
भारी विना बस्नै सक्दैन

तिमीले जति नै प्रजातन्त्रको
दूध खुवाऊ समाजवादको दही खुवाऊ
स्वतन्त्रताको नौनी नै खुवाऊ
गधा गधै हो उसलाई भारी नै चाहिन्छ
भारी हालिदिने मानिसै चाहिन्छ

ए नेपाली
गधालाई नुहाउन छाडिदेऊ
यी गधाले तिम्रो अभावको
भारी बोक्दैनन्
तिम्रो पीडाको भारी बोक्दैनन्

तिमीले उसको बन्दुक थाम्यौ
उसको गोलाबारी थाम्यो
उसको झुटबारी थाम्यो
आफ्ना पुत्र चढायौ पुत्री चढायौ
समय चढायौं पुस्ता चढायौं
गधा गधै हो
ऊ कृतज्ञ हुँदैन
उसले बाटोमा छेर्न छोड्दैन
आफूलाई सर्वश्रेष्ठ र सुन्दर
भन्न छाड्दैन ।

प्रतिक्रिया
Loading...