प्रल्हाद ढकाल

केही अघि सम्म तिमीले गर्ने

समानता र जनवादका कुराहरु

यत्रतत्र फ्याँकी

तिमी कुर्सी चढेको

तिम्रो त्यो बोके दाह्री

तिमीले पालेको हैन आफै बढेको

कति चाँडै

तिमीले बिर्सीसक्यौ

क्रान्ति र साम्यवादका कुराहरु

तिमीले भुलिसक्यौ

तिमीले घोकेका र फुकेका

मीठा र तीखा भाषणहरु

तिमीले पारदर्शी टालोले

लाज टालेका छौ

निरीह वानर सेना कजाउन

बोके दाह्री पालेका छौ

तिम्रो बोके दाह्रीमा शंका गर्ने

ऐरे गैरे खैरे जैरे सबैछेउ

नबोलाए पनि पुगेका छौ

ए बाबा यो त नक्कली हो

शंका नगर भन्दै ढोगेका छौ

लालचबस तिमिले

नेपाली टोपीको स्वाभिमान गालेका छौ

वानरसेनाको मन राख्नै भएपनि

बोके दाह्री पालेका छौ ।