साहित्यपोस्ट
नेपाली भाषा र साहित्यको सम्पूर्ण पत्रिका

उनको जन्मदिवस

Chovar Blues Mobile Size

उनको जन्मदिवसमा
उनकै नाम अंकित बर्थडे केकसँगै
उनी आउने तीव्र आशमा पर्खिरहेको म

पर्खाइको त्यो छट्पटीमा,
अप्रतिम सुन्दर उनको तस्बिर हेर्दै
रोमाञ्चक स्मृतिले अन्तःमिठास पैदा गरिरह्यो

मधुमय उनका शब्दहरू
मन्त्रमुग्ध पार्ने उनका नयनहरू
उनको मधुर सामिप्यताको आकांक्षा गर्दै रहें म

उनको अनुपस्थितिले गर्दा
बोझिल बनिरहेको त्यो कठिन पलमा
कल्पनारुपी अनुपम संसारमा एक्लै डुलिरहेँ म

त्यो निस्तब्ध वातावरणमा
निभौँला झैँ गरिरहेको मैनबत्तीले समेत
शुभेच्छा दिन नपाउँदाको अधैर्यता देखाइरह्यो

sagarmani mobile size

मत्थर भएको प्रकाशसँगै
क्षितिजतिर विलीनन भइरहेका रवी पनि
मलाई एक्लो छोडी गन्तव्यतर्फ दौडिरहेका थिए

सम्झाइरहेको थियो मलाई
एकतमासले पग्लिरहेको त्यो मैनबत्तीले
अब यही उत्सबलाई बर्षदिन पर्खिनुपर्ने तितो सत्य

अनायास मेरा कपोलहरूमा
चिसो अनुभूति हुँदा पो थाहा पाएछु मैले
मेरा दुवै नयनहरू अकस्मात अश्रुपूर्ण हुँदै गएछन्

रुझेका ती नयनहरू लिएर
सोचें, सायद कतै मनाउँदै होलिन उनी
आफ्ना अनन्य प्रियजनहरूसँग, अद्वितीय जन्मदिवस

जसै त्यो मैनबत्ती निभ्यो
जीवनकै अविस्मरणीय पल बनाउने
चाहनालाई तिलाञ्जली दिंदै म फर्किन बाध्य भएँ ।

 

प्रतिक्रिया
Loading...