मानिसको सफलता भाग्यमा होइन
उसको प्रयास र संघर्षमा अडिएको हुन्छ
तिम्रो आस्था उनको योग्यतामा होइन
मुटुभरिको निःस्वार्थ प्रेममा रहेको हुन्छ

सुन्दरता शरीरको रङ र नापतौलमा होइन
उनको दयालु र कृपालु हृदयमा रहेको हुन्छ
आँखाभरि सजिएको मिठो सपनामा हुन्छ
जीवनको भोगाइ र यादहरूको कल्पनामा हुन्छ

प्रेम, अटुट विश्वास र बलिदानको अनुभूतिमा हुन्छ
अरबौँ रुपैयाँले किन्न नसक्ने अमूल्य खुसीमा हुन्छ
तिम्रो सपना पूरा गर्न दिएका अनवरत् साथहरूमा हुन्छ
दस औँला जोडी धन्यवाद दिनेहरूको हातहरूमा हुन्छ

तिमी प्रेम परमेश्वरको हरेक सृष्टिमा खोज
प्रत्येक प्राणीहरूको निसंकोच दृष्टिमा सोध
शून्यतामा पनि पाइने सत्यताको उपहारमा खोज
मौनतामा पनि सदा मुस्कुराउने मुहारमा रोज

हिमाली लहरले छरेका मन्द मुस्कानमा
पहाडले सजाएको हरियाली वृक्षमा
सुस्तरी सुसेल्ने सिर्सिरे बतासमा
अनि फूलहरूले छर्ने सुमधुर सुवासमा

नीलो आकाशको सुन्दर चराहरूलाई हेर
सूर्यको प्रकाशको न्यानो अंगालोमा रहेर
चिर्बिरे आवाजहरूले बोलाइरहेको सुन
अनन्त यात्रामा निस्फिक्री उड्ने सपना बुन

तिमी प्रकृतिको सजीव, सुन्दर अनि बुद्धिमानी प्राणी
सजाऊ संसार प्रेमले हरेक साँझ हरेक बिहानी
आँखा बन्द गरी प्रेमिलो निकटताको महसुस गर
क्रोध, लालच र घृणा त्यागी बनाऊ प्रेमको संसार ।