साहित्यपोस्ट
नेपाली भाषा र साहित्यको सम्पूर्ण पत्रिका

उमाकान्त शर्माका तीन कविता

उमाकान्त शर्मा (असम)

१. अनुभव

मलाई लाग्छ कतै
मेरो प्राणवायु चोरिएको
मर्न लागेको माछाझैँ
एकुरियम फुटेपछिको
आँखो फुटाई अन्धो पारेको
मुख थुनेर
मस्तिष्क घोपेको ।

bahulako diary small and inside post

मलाई लाग्छ कतै
हात लाचार भई सुकिसकेको
पक्षाघातमा खुट्टा
अचल हुन थालेको
छटपटाइरहने कलेजोको
स्पन्दन स्तब्ध भएको
मस्तिष्क बजारमा बेचिन लागेको
मेरो आकाशबाट
प्राणवायु चोरिएको
म छटपटाइरहेको
मर्न लागेको माछाझैँ
एकुरियम फुटेपछिको ।

२. नयाँ इतिहास

मक्की सकेको हड्डीमा
मासु टँसाएर त हेर
हरियो नसाभित्र
रगत बगाएर त हेर
स्पन्दन बन्ध हुन्छ भने
कलेजो थपेर हेर ।
ऊ आज अस्थिर छ
जिस्काएर त हेर
न्याच न्युच पार्छ तिमीलाई
सामु आएर त हेर ।
रगत उम्लिसकेको छ
छोएर त हेर ।
नयाँ इतिहास कोरिसकेको छ
पातो पल्टाएर त हेर ।

३. भित्री बाघ बोल्दै छ

सावधान गरिदेऊ सबैलाई
मेरो भित्री बाघ
फुत्किसकेछ
सन्त्रस्त पार्दै सबैलाई
उता मान्छे खान थालेछ ।

कहिले यता कहिले उता
च्याप्दै घाँटी चिर्दै भित्ता
भोको धेरै दिनको
उता मान्छे मार्न लागेछ ।

नरमासु लालची ऊ
अब ता हिंस्रक बनिसकेछ
आलो मासुको स्वादले

उसलाई नरपिशाच पारेछ ।

बाघ पनि अचम्मको रहेछ
रोजी-रोजी मान्छे मार्दै छ।

र भन्छु साथी
सावधान गरिदेऊ सबैलाई
मेरो भित्री बाघ
फुत्किसकेछ
अब ता ऊ मान्छे खान थालेछ ।

प्रतिक्रिया
Loading...