Chovar Blues Mobile Size

 

 

कृष्ण बाउसे

ठिही बोकेर आएकाले
आफैँ पनि काँपिरहेका छौ तिमी ।

मसँग हिटर छैन तिमीलाई तताउन
मसँग सिरक छैन तिमीलाई ओढाउन।

मसँग तातो सुप छैन
तिम्रा आन्द्राभुँडीलाई
तताउँदै फुलाउन ।

प्रत्येक दिन एकुन्टाका दरले
खप्टेर लगाइदिँदैछु तिमीलाई
मैले नै जडाउरी पाएका फाटेका लुगाफाटा ।

पियाउँदैछु तिमीलाई
झोलको धितमर्ने गरी
ट्युबवेल थिच्दै
एकाबिहानै तानेर जमिनमुनिको बाफिलो पानी।

तपाउँदैछु तिमीलाई
हिटरको विकल्प
दङ्दङ्ती प्लास्टिक गन्हाइरहेको
घुरको धुवाँको तातो।

ए हेपाहा हिउँद !
ए, अनिच्छित पाहुना !
तारे होटलमा नबसेर
हुनेखानेका घरमा नपसेर
पस्यौ नि मेरै घरमा
यो सुदामालाई जे गरेपनि हुन्छ भनेर,
– बस अब नाकमा सिंगान बोकेर !
– बस अब स्याँस्याँ गर्दै लगातार खोकेर !
– बस अब दम, क्षय र अर्बुद रोगका गोली धोकेर !