साहित्यपोस्ट
नेपाली भाषा र साहित्यको सम्पूर्ण पत्रिका
sp machapuchara cash back ads

कविताः तिमी र ममा फरक

 

ratna book ads
राजन पराजुली

तिमी मेरो शरीरसँग छोइयौ
मेरो शरीरमा बगेको पसिना तिमीसँग छोइयो
कयौँ पटक गन्न
मैले हातमा थुक लगाएर तिमीलाई छोएको छु
कति चोटि मैले छोएको पानीमा
तिमी डुबेका छौ
तिमी कयौँ रात मेरो घरभित्र
बास बसेका छौँ
मैले जे जसरी राखे पनि
तिमी पवित्र भयौ
सबैसँग बिना झगड़ा चल्यौँ

सबैका खोल्टिमा
सबैका घर घरमा
सबैका मठ मन्दिरमा
सबैका हात हातमा
चुपचाप चल्यौँ

कसैले तिमीलाई
यो छोइएको छ
तैँले छोएको छस् म लिन्नँ भनेनन्
हात थापेर
घाममा नसुकाई
सुनपानी नछर्किएरै
पवित्र नबनाई
खोल्टिमा राखे
आफ्नो घरभित्र लगे

म मेरो पछाडिको थरका कारण चलिनँ
मैले उनीहरूका हरचिज छोइदिँदा
घाममा सुकाउँछन्
सुनपानी छर्किन्छन्
आँगनभन्दा पर जान दिँदैनन्
उनीहरूलाई नछोइकन पर बस्नुपर्छ
झुक्किएर छोइयो भने
हतपत जनै बदल्छन्

तिमी कागजको खोस्टो हौ
मैले छोए पनि चल्यौ
तिमी मूल्यवान् हौ
मैले पसिना टँसाए पनि चल्यौ
तिमी ठूलो हौ
मैले थुकले छोए पनि पवित्र भयौ
र त उनीहरूको घरभित्र छिर्यौँ

म मानव
तिमीभन्दा अमूल्य बनाइदिन्छन्
तिमीभन्दा अपवित्र ठहराइदिन्छन्
तिमीभन्दा नचल्ने गराइदिन्छन्

मैले छोएका
तिमीबाहेक
सबै छोइन्छ
सबै अपवित्र ठहरिन्छ
कथित ठूला जातिका लागि….।

चितवन

प्रतिक्रिया
Loading...