माधव सुवेदी (असम)

मान्छे नै मान्छेको घुइँचोमा

बाँच्न तानाबाना

धेरै मिलाउनु छ ।

खेतीको त्यो तल्लो डाँडोमा

गरैगरा मिलाएर

धेरै अनाज उब्जाउनु छ ।

कर्मको आधारमा

आफ्नै मुलुकमा कीर्ति

आफैँ कमाउनु छ  ।

मान्छे नै मान्छेको घुइँचोमा

बाँच्न ताना बाना धेरै मिलाउनु छ ।

बठ्याइँ आफ्नो गर्नेले गरिरहून्

कोही तल झरेको देख्दा

खुच्चिङ पऱ्यो भन्ने पनि धेरै छन्

आफैँ जाँचिनु सारो छ

आफ्नै मापदण्डमा ।

अप्ठ्यारैअप्ठ्यारो छ सङ्घर्षको

मानवजीवनमा निद्राभरि

देखेका सपना साकार हुँदैनन्

सपना त जागै छँदा

देख्नु छ मान्छे नै मान्छेको घुइँचोमा

बाँच्न तानाबाना धेरै मिलाउनु छ ।