साहित्यपोस्ट
नेपाली भाषा र साहित्यको सम्पूर्ण पत्रिका

उज्यालो सपना

रात
अन्धकार चिरेर चम्केका ताराहरू
अनि तिनै ताराहरूको बीचमा बलेको
जूनको गर्विलो अनुहार बोकेर
अचेल आउन थालेको छ सपनामा
मेरो सपना नदेखि निदाउने चाहनाको
विरोधमा उभिएर हरेक राति

यसरी रात
उज्यालो बोकेर सपनामा उदाउँदा
मेरा अरू सपनाहरूमा जस्तै म
खै किन हो झस्किएर
बिउँझेकी छैन आजसम्म
त्यसो त मैले
राति कौसीमा निस्किएर
आकाशतिर नहेरेको पनि धेरै भयो
यद्यपि सन्ध्या आरतिलाई छोड्न
म असमर्थ छु

न त जून
मात्र मलाई उज्यालो दिन उदाउँछ
न ताराहरू मलाई लिन आउँछन्
तर पनि मैले
कहिले जून कहिले तारा भएर
हरेक राति रातमा सम्भावनाहरू देख्न थालेकी छु
देखेर उज्यालो सपना।

प्रतिक्रिया
Loading...