साहित्यपोस्ट
नेपाली भाषा र साहित्यको सम्पूर्ण पत्रिका

समय हो बितिहाल्छ

कविता

Chovar Blues Mobile Size

कति राम्रा समय आए
रोक्न सकिएन
नयनभित्र थुन्न खोज्दा
थुन्नै सकिएन ।
याद बनी मस्तिष्कमा
रहनु सिवाय
बिन्तिभाउ गर्दा पनि
थाम्नै सकिएन

त्यस्तै
पीडाका समय आए
वेदनाका समय आए
भोग्नै पर्‍यो
झेल्नै पर्‍यो
जति नरुचाए पनि
पठाउनै सकिएन
हटाउनै सकिएन
नभोगी बिताउनै सकिएन

कुनै समय
सुखको समय
यौवनको समय
बाल्यकालको समय

समय न हो
कहाँ रोकिन्छ र
चाहँदैमा

बितिहाल्छ
ओझेल परिहाल्छ
दौडिहाल्छ

त्यस्तै
दुःखको समय
वृद्धावस्थाको समय
रोगाएको समय
भोकाएको समय
दुखेको समय
नचाहँदैमा
किन आउँदैनथ्यो
आउँछ
भोग्नै पर्छ
झेल्नै पर्छ
बिताउनै पर्छ
किनभने
समय न हो
बितिहाल्छ
गइहाल्छ
बस्दैन टाँसिएर
कसैसँग
फगत गइदिन्छ
नरोकिई
एकनास

sagarmani mobile size

यो पनि यस्तै
समय हो
अहिलेको
प्रकृतिले बदला
लिएको
या ईश्वरले
लिएको परीक्षा
मानव जातिसँग
आविष्कारसँग
विज्ञानसँग
अहमसँग

त्यसैले
आज मान्छेबाहेक
सबै ठीक छ
वातावरण प्रदूषण
मुक्त छ
फूलहरु मस्त छन्
चराचुरुङ्गी फुरुङ्ग
उन्मुक्त छन्

फगत
मान्छे मात्र
विवश छ
थुनिएर बाँच्न
निसास्सिएर बाँच्न
खुम्चेर बाँच्न

किन ?
समय हो
सिकाउन आएको छ
बुझाउन आएको छ
झकझकाउन आएको छ
तर
बितिहाल्छ
गइहाल्छ
रोकिँदैन
भोलि नयाँ समय
उदाउनेछ
नयाँ बिहानी लिएर
नयाँ विश्वास लिएर

बल्खु, काठमाडौँ

प्रतिक्रिया
Loading...