साहित्यपोस्ट
नेपाली भाषा र साहित्यको सम्पूर्ण पत्रिका

अहोभाव

कविता

कतै टाढा टाढा
धिप् धिप् धिप् धिप् झुल्किन्छ बत्ती
देखाउँछ बाटो
झल्काउँछ, सुन्दरता धमिलो धमिलो
कहिलेकाहीँ
जुनकिरी भै वरिपरि घुम्छ
भन्छ म तिम्रै यात्राको सहाय हुँ
म तिम्रै एक अवयव हुँ
बिहानीको नव-नव खबर हुँ
तिम्रै मनको गहिराई हुँ
भरिदिन्छ भाव रसिलो रसिलो ।

कहिले छायाँ भै साथसाथ डुल्छ
म तिम्रा सही गलत कर्मका साक्षी हुँ भन्छ
अहो ! यो प्रेम के हो ?
यस्को मैदान कति विशाल
यस्को स्वतन्त्रता कति अपार
स्वयं नै स्वयंसङ्ग अलग हुन पनि पाएको छु
अब म आफ्नै स्वरुपमा फर्कन्छु भन्दा
हृदयमा जीवनप्रति अटल श्रद्धा
अनि उस्कै बलियो आभाष पाएको छु
यसमा मैले फोहोरमा डुब्न पनि पाएको छु
अब उत्रन्छु भन्दा स्वागतको डुङ्गा पाएको छु ।

मैले बिना संघर्ष जीवन पाएँ
यो विराटसभामा सहभागिता पाएँ
यस सभाको गरिमा बन्न सकुँ
म तिमी भै तिमीमै रहन सकुँ
अहो ! यो प्रणय सौगात तिम्रो
हो यो जीवन मेरो
अघि बढुँ, अघि बढुँ ।

bahulako diary small and inside post

सुबास बजगाईं

प्रतिक्रिया
Loading...