सूरज चापागाईँ (मणिपुर)

धरती बचाउन उभिएका छन् मानिस 

एक अँजुली उज्यालो बोकेर 

प्रत्येक दिन मानिस आज घाम रोप्दै छन् । 

प्रोबेबिलिटीको अँध्यारो रातले 

कटकट खाइरहेछ समय 

हाहाकारबिच कतै रित्तो थाल 

लडेको छ लावारिस 

कतै जलेका सपनाहरूको खरानी धसेर 

एक्काइसौँ शताब्दीको कालो हावा गरिरहेछ 

नटराज 

निकै दिन भयो 

भविष्य फुल्ने कोठा बन्द भएको 

विद्यालयलाई अनुशासनमा 

राख्ने घण्टी नबजेको यति बेला 

सहरका बन्द ढोका र कारखानाहरूभित्र 

देशको जिडिपी कैद छ। 

मानवकै निमन्त्रणामा 

आएको महामारीले आज 

मानवकै विरुद्ध उभिएको छ 

कालो रूप लिएर 

प्रकृति कतै दर्शक भई 

मानवताको गीत गाउँदै छ 

कतै आफ्नो भयावह रूप 

प्रदर्शन गरिरहेछ 

तर पनि पृथ्वीको मालिक मानिस, 

हारेको छैन 

भोलिको नयाँ बिहानका निम्ति 

आज कैयौँ अग्निपरीक्षामा होमिएका छन् ।