कविता : घर

धर्मेन्द्र उपाध्याय (असम)

म जसरी घरभित्र हुन्छु

मभित्र पनि धेरै घरहरू हुँदा रहेछन् ।

कतिपय घरभित्र म बस्दो रहेछु

अनि मभित्र कतिपय घरहरू बस्दा रहेछन्

कहिलेकहीँ म बस्ने धेरै घरहरूमध्येको

एउटामात्रै घरमा म बस्छु

अनि छेवैको तिमी मात्रै बस्ने घरमा म पस्छु ।

तर तिमीभित्र पनि अरू धेरै घरहरू हुँदा रहेछन्

ती घरहरूमा तिमी बाँडीचुँडी बस्दो रहेछौ ।

आज तिमीलाई खोज्दै जाँदा

कोहीवेला चिनेकै तिमीलाई देख्दो रहेछु

कोहीवेला नचिनेको तिमीलाई ।

र पनि आँखा जुध्नेबित्तिकै

दुबै जना हातेमालो गर्दै

अर्कै एउटा घरमा पस्दा रहेछौँ

बाँसुरी खोज्दै ।