कविता- युग

श्यामु लम्साल (बर्मा)

बोल्नुपर्छ सत्य

असत्य अनि झूट पनि

कलियुगको रीति

कसैको डर न कर ।

 

स्वतन्त्र जिउनुपर्छ

मन बेहाल भए पनि

मुहार मुस्कुराउँदै

असत्य नि बोल्नुपर्छ ।

 

साथै सत्य पनि

अनि मात्र जीवन

जीवनजस्तै हुन्छ भन्नेलाई

देखाउनु छ यार

जिउनु कसरी

बाँच्नु कसरी भनेर ।

 

तर अफसोस लाग्छ

यहाँका मानिस

दुई छाक खानाका लागि

सर्वस्व लुटाएको

करोडौँ झूट बोलेको

दानवलाई देउता मानेको

वा !

बुद्धिजीवी मानव

कसरी गरौँ तिम्रो प्रशंसा

तिम्रो रीतिथिति देखेर

आज राम ,कृष्ण, बुद्ध भन्दै

भोलि अल्लाह क्रिस्चियन भन्दै

जीवन बिताउनु कुन युगको रीति हो ?

 

म अबोध निमुखालाई

दर्साइदेऊ

वास्तविक जीवन जिउन

यस्तै षड्यन्त्रको  युग रच्नुपर्छ र ?

लेखकका अन्य सिर्जनाहरू पढ्न यहाँ क्लिक गर्नुहोस्...