हिजो हजुरबुवाले

घरमा टुकीबत्ती बालेर

बारीको गरामा बिजुलीको

खम्बा गाड्दा

आज नातिको पुर्पुरो बलेको छ।

हिजो हजुरमुमाले

हिलो मुछेर लगाएको

बारीको काल्लाहरू

आज नातिको छाक

टार्ने भाँडो भएको छ ।

हिजो हजुरबुवाले

घामपानी हुरीबतास

दुस्मनको तातो गोली

सहेर जोडिएको रङ्गशाला

जत्रा बारीका गराहरू

आज नातिले चिरा-चिरा

पारी मुख मिठ्ठाउँदा

ती पितृ भएका हजुरबुवाको

छाती कति जलेको होला ।

हिजो हजुरबुवाले कमाउनुभएको नाम

जोगाउनुभएको इज्जत

अनि

हजुरमुमाले सञ्चय

गरिदिनुभएको मान प्रतिष्ठान

आज नातिले

ठेस पुऱ्याउँदा

आघात पुऱ्याउँदा

ती पितृ भएका हजुरबुवा

हजुरमुमाको आत्मा कति रुँदो होला ।

जीवन के हो?

कर्तव्य के हो?

अधिकार के हो?

सबै बुझ्न र जान्न पर्दछ

आफ्नो व्यवहारमा प्रयोगमा ल्याउन पर्दछ ।

कर्तव्य सेवा हो

अधिकार धर्म हो

संस्कार हो

जीवन प्रयोगशाला हो

पितृ आदर्श हुन्

अमूल्य सम्पत्ति

जसको नामले आज

नातिको पहिचान बनेको छ

त्यो पहिचान गुमाउनु हुँदैन

पुर्खाको नाम बजारमा बिकाउनु हुँदैन

मान गर सम्मान गर

भोलि ती आफ्ना सन्ततिका लागि

संस्कार बनाऔँ

नातिलाई सम्पत्ति होइन

संस्कार दिऔँ।