सुरज साउद

मकैबारीमा
चराहरू तर्साउन

बेला-बेलामा

फेरिरहनुपर्ने ‘मान्छे जस्तै बुख्याँचा’

र,
सिंहदरवारको कुर्सीमा
छिन-छिनमा बदलिरहने
‘बुख्याँचाजस्तै ‘मान्छे’ देखेर

आजित आमाले सोध्नुभो बाबु …!
मान्छेहरू बुख्याँचाजस्ता हुन् कि ?
बुख्याँचाहरू मान्छेजस्ता हुन् …?
‘उस्तै…उस्तै हुन् आमा…’ मैले भने ।
…………………………
आमा मुसुक्क हाँस्नुभो

मेरो दृष्टिभ्रम वा अल्पज्ञान देखेर

अनि भन्नुभयो
‘..अलिकति फरक पनि छ है बाबु ..’

के फरक छ आमा !
मैले आश्चर्य भावमा सोधेँ
आमाले सरल भावमा जवाफ दिनुभो

मकैबारीका ‘मान्छे’ जस्ता ‘बुख्याँचाहरू’ हामी आफैँ बनाउँछौ
तर सिहँदरबारका ‘बुख्याँचा’ जस्ता ‘मान्छेहरू’ छिमेकीले बनाउँछ’

कीर्तिपुर काठमाडौँ