साहित्यपोस्ट
नेपाली भाषा र साहित्यको सम्पूर्ण पत्रिका

प्रश्न, प्रश्न, फेरि प्रश्न 

आफैँले हालेको भोटको थुप्रोमा
निसास्सिएर
मर्ने बेला भइसक्यो
अर्को चुनावसम्म बाँचिन्छ होला र?

नीलो मसीले लत्पतिएको नङले
अझै प्रश्न गर्दैछ
विकासको रङ कस्तो हुन्छ?
भोक कुन-कुन रङ मिसिएर बन्छ?
समृद्धिको इतिहास कुन मसीले लेखिन्छ?
भ्रष्टचारको रङ र कुर्चीको रङ
किन उस्तै हुन्छ?

bahulako diary small and inside post

हेत्तेरिका!
स्वस्तिक चिह्नको गोलोजस्तै
शून्य जिन्दगी बोकेर
उत्तर आउने बेलासम्म बाँचिन्छ होला र ?

प्रजातन्त्र हुर्केको पनि यत्रा वर्ष भो
तर अझै जुङ्गाको रेखी बस्दैन नाकमुनि
अझै डन्डिफोर आउँदैन अनुहारमा
कपाल फुलिसक्यो
अझै बैँस आउँदैन आँखाहरुमा
बाकसमा खसाल्दा-खसाल्दै विश्वासको मत
अविश्वासको अङ्कुर कतिबेला टुसाउने हो?

भन न साइँलादाइ
कुन चाहिँ भोटले
मुस्कुराउँछ बैंशालु प्रजातन्त्र ?
बाँचिएला र प्रजातन्त्र फक्रिने बेलासम्म?

हेत्तेरिका !
किन प्रश्नमाथि उक्लिइरहन्छ अर्को प्रश्न र बर्बराइरहन्छ गर्भिणी समय?

आफैँले हालेको भोटको थुप्रोमा
निसास्सिएर
मर्ने बेला भइसक्यो
अर्को चुनावसम्म बाँचिन्छ होला र?

प्रतिक्रिया
Loading...