साहित्यपोस्ट
नेपाली भाषा र साहित्यको सम्पूर्ण पत्रिका

दोष

कविता

सानो छँदा छोराले छिमेकीको काँक्रा चोर्‍यो
मेरो छोराले हुँदै हैन भन्यौ आमा

छोराको ओड पस्यौ

छिमेकीलाई दोष दियौ छोरालाई सफाई

 

bahulako diary small and inside post

साथीसँग खेल्दाखेल्दै झगडा भयो

त्यै मोरो छुच्चो भन्यौ आमा

छोराको गुन गायौ

छोराको साथीलाई दोष दियौ छोरालाई सफाई

 

छोरो बरालिँदै हिँड्न थाल्यो

साथीहरु खराब भए भन्यौ आमा

छोरालाई चोखो पार्‍यौ

संगतलाई दोष दियौ छोरालाई सफाई

 

बाटो हिँड्ने केटी जिस्क्यायो रे छोरोले

त्यै मोरी उत्ताउली थी भन्यौ आमा

हिंसालाई साथ दियौ

पराईलाई दोष दियौ आफ्नालाई सफाई

 

ढोका थुनीथुनी बुहारी कुट्यो छोराले

त्यै राँडीको बेहोरा छैन भन्यौ आमा

अपराधलाई बाटो दियौ

पीडितलाई दोष दियौ अपराधीलाई सफाई

 

अब बूढी भयौ आमा, आँखा पनि देख्न छाड्यौ

कान पनि सुन्न छाड्यौ, हिँड्न पनि सक्न छाड्यौ

छोरोले डोर्‍याउँदै वृद्धा आश्रम पुर्‍याइदियो

कसलाई दोष दिन्छौ आमा, अब कसलाई दोष दिन्छौ आमा?

प्रतिक्रिया
Loading...