African female dancers flat set for web design. Cartoon aboriginal people dancing folk or ritual dance isolated vector illustration collection. Tribal dance and Africa concept

हिक्मत थापा (अफ्रिका)

फेरि आयो शुक्रवार
र ऊ सधैँझैँ आई मसँग
हप्ताभरिको कामले थकित अनुहारमा,
अलिकति चहक बढाउँदै
सधैँझैँ उसले कुरिरहने सप्ताहान्तमा
ऊ फेरि आई,
यो सप्ताहान्तमा पनि
यी दोहरिरहने सपनासाथ ।

ऊ उन्मुक्त हुनेछे
फेलाकुट्टी अफ्रिकन सङ्गीतसँगै
उन्मुक्त नाच्नेछे,
सुकाउने छे हप्ताभरका
पसिनाका गन्धहरू
अत्तरले गन्हाएकाहरूका भिडमा
कसैसँग अङ्गालोमा कस्सिनेछे
रातभरलाई अनिदोसँग साटेर ।

तर ऊ आई अघि नै
फेरि भनी–
विकेन्ड ओ ओगा !

साँझपख झिलिमिली हुने बारहरूको लर्काेबाहिर,
छातामुनिको मामा ब्यासीको बासी रेस्टुराँमा
पेपेसुप
उसिनेको अन्डा र इन्डोमीसँगै
पेट पुक्क पारिसकेपछि
ऊ पस्नेछे,
छेउकै बारभित्र
र नाच्नेछे रातभर
ओ–ओ ब्याड डान्सर भन्दै
कसैका चिसा हातहरू समाएर,
भोलि पल्ट ओइलाउनु जो छँदै छ ।

सुस्ताउने छे,
विकेन्ड ओ ओगा भन्दै ।

एक सप्ताहान्तको
तातो रातमा
उसले चिसा कथाहरू सुनाएकी थिई,
उसका बाजे
गोरा अङ्ग्र्रेज मालिकका
सलाईका बट्टाहरूसँगै
गाउँका राजासँग साटिएर,
कहिले नफर्किने कुवाको पानी खुवाएर
उता जमैका वा वारवाडोसको उखुबारीमा
मजदुरीमा लग्दालग्दै
बीच समुद्रमा नाउमै सेकिएर मरे रे,
फ्ँयाकिएका थिए आन्ध्र–महासागरको बीच छालमै !

सप्ताहान्तको त्यो रात
मानौँ आन्ध्रसागर उसकै आँसु बनेर बगेको थियो,
आँसु टल्केका काला गालामा
अर्काे कथा थपेकी थिई,
उसका पिता
लगुनमा ग्यासको पाइप फुट्दा त्यतै जलेका थिए ।
काका,
खेतमा बाली खान आएका गाईका झुन्डहरू लखेट्दा–लखेट्दै,
फुलानी गोठालाको एके–४७ को
गोलीले मरे ।

आमा,
तन्त्रमन्त्र गर्ने साधुले लठ्याएर
जिउँदै कलेजो, मुटु, फोक्सो निकालेपछि
झाडीमा लासमात्र भेटिइन् ।
बहिनी,
स्कुल पढ्दा–पढ्दै बोको–हरामको अपहरणमा परिन्,
कतै दुखैको आँसु पिइरहेकी होलिन्
सम्बोसाको झाडीभित्र !

दुःखको निजर र त्यसको भेलहरूबाट बाँचेर
ऊ यता छ, उष्ण बारभित्रको तापमा
ओगा विकेन्ड ओ ओगा भन्दै !

तर यो पालि
अलि भिन्नै भयो
सप्ताहान्तपछिको सोमबार
ऊ आई र भनी–
ओगा ओ ओगा !
हाउ इज योर विकेन्ड ?
अनि अलि फक्रिएर
सभनाहमा फुल्नै आँटेको काँडे फूलझैँ मुस्कुराई ।

मैले सोचेँ–
यो पालि उसले दुःखका सबै सागर रित्याई होली ।
सायद भन्ने छैन अब यो सप्ताहन्तमा
ओगा ओ ओगा
विकेन्ड ओ ओगा !

लेगोस, नाइजेरिया
अप्रिल २४, २०२१

ओगा – आदरर्थी शब्द, जस्तै साहेब, सर
फेलाकुट्टी – प्रख्यात नाइजेरियन सङ्गीत
पेपेसुप – पिरो सुप
इन्डोमी – चाउचाउ
फुलानी गोठाला – सशस्त्र गाईपालक, घुमन्ते कविला
सभनाह – घाँसे ससाना झाडी भएको जङ्गल
निजर – नदी विशेष
सम्बोसा – एक घना जङ्गल ।