साहित्यपोस्ट
नेपाली भाषा र साहित्यको सम्पूर्ण पत्रिका
FIRST ANNIVERSARY

कविता:  शुभकामना, नयाँ वर्षको !

                      –
माटो पुरानै हो
भूमिगत माटो
यता खनिन्छ,
खाल्टो बन्छ र
उता भरिन्छ
एवं क्रम
ढुङ्गा हालिन्छ खाल्टोमा
ढुङ्गा पुरानै हो
जग पुरिन्छ सिकर्मीको पौरखले
गारोको आकार दिन्छ
सिमन्टीमा घोलिन आउँछन्
गिटी र बालुवाहरू
मेरो जिन्दगीमा घोलिन आएका
आँसुका ढिक्का जसरी
र त्यहाँ मिसिन आउँछन्
श्रम पोख्नेका पसिना र
भिजिन आउँछन् तिनैका रगत ।
प्रविधिले नयाँ बनाएको सिमन्टीमा

गिटी, बालुवा सबै पुराना

रमेशचन्द्र घिमिरे
कुटिएको गिटी
सोरिएका बालुवा
पुरानै पुराना कुराहरू बटुलिएर
अनि, केवल
सिमन्टीमा मुछिएर र
रङहरूमा चोबलिएर
मेरो नयाँ घरले आकार लिएको छ
ठीक त्यसरी नै
क्यालेन्डरका रङ्गीन पानामा सजिएर
नयाँ वर्ष आएको छ
देश पुरानै भए पनि!
भेष पुरानै भए पनि!
रीतिथिति व्यथा बिमार
जम्मै पुरानै भए पनि
धुवाँले पोतिएको कालो पर्दा
छोपे जसरी अनि
पुरानो घाउलाई नयाँ मलमले
सन्चो बनाउन खोजेजस्तो गरी
पुरानो क्यालेन्डर विस्थापित भएको छ
भित्ताको साइज फेर्न
नयाँ क्यालेन्डर टाँगिएको छ
म घरको नयाँ भित्तामा
नयाँ क्यालेन्डर हेर्दै
मनभरि पुराना वेदना सँगालेर र
पुराना घाउहरू सुम्सुम्याएर
तिमीलाई दिन खोज्दैछु –
शुभकामना, नयाँ वर्षको !
 –भोर्लेटार, लमजुङ ।
प्रतिक्रिया
Loading...