केशव ज्ञवाली

के को भोक  बतासियो सहरमा    वैरीहरु हो भन
सुत्दैछन् किन आज मानिस सबै आग्लो लगाइकन
कस्तो पाप रहेछ  यो मनुजको संसार सारा सर्‍यो
मान्छे हिँड्न डराउदै छ भन हे विज्ञानले के गर्‍यो?
                             ।।१।।
के होला र  सजाय यो प्रकृतिको  संसार नै रोकियो
धाँजो फाट्न सकेन यो जमिनमा आकाशमा ठोक्कियो
के माग्छौ र नमाग दास जनता सम्मान ठाडै झर्‍यो
ती आतङ्क विदेश रोइरहँदा विज्ञानले के गर्‍यो?
                           ।।२।।
कस्तो रोग छिरेछ आज जनता रोएकराए कति
भन्थे राज म गर्छु विश्व वशमा देख्दै छु यो दुर्गति
पृथ्वीमा यसले गरेनछ दया आतङ्क मात्रै गर्‍यो
धर्ती लोक र स्वर्ग हल्लिरहँदा  विज्ञानले के गर्‍यो?
                         ।।३।।
रोगी लौ किन अस्पताल नपुगी लाचार झैँ फर्कियो
पीडा दु:ख अभाव यो बखतमा पानी सरी दर्कियो
के गर्दै छ र सोच के छ यसको संसार कब्जा गर्‍यो
ठाडै प्रश्न गरेर सोध्छु अब ता विज्ञानले के गर्‍यो?
                         ।।४।।
पोखरा
लेखकका अन्य सिर्जनाहरू पढ्न यहाँ क्लिक गर्नुहोस्...