साहित्यपोस्ट
नेपाली भाषा र साहित्यको सम्पूर्ण पत्रिका

कविताः भगवानको मन

Chovar Blues Mobile Size

=========

मान्छेहरु सोच्दा हुन्~

‘भगवानलाई फूल मन पर्छ’

‘भगवानलाई दुध मन पर्छ’

‘भगवानलाई लड्डु मन पर्छ’

अझ सोच्दा हुन्-

sagarmani mobile size

‘भगवानलाई रगतसमेत मन पर्छ’

तर भगवानलाई भने

मान्छेहरुले पूजा गर्ने तरिका नै मन परेको छैन ।

भर्खरै भमरासंग पिरती गाँसेर

मुस्कुराउन सिक्दैथियो एउटा फूल

त्यति सुन्दर फूललाई

जवानीमै घाँटी निमोठेर आँफुलाई चढाएको

भगवानलाई कतिपनि मन परेको छैन ।

बरु

कुनै बच्चाले आफ्नो आत्मा भिजाउन पाउने थियो

जस्ले जन्मिँदै आमा गुमायो !

गाईको दुधले आँफुलाई नुहाईदिएको

भगवानलाई पटक्कै मन परेको छैन ।

भगवान त केवल शान्ति चाहन्थे

अहिँसा चाहन्थे

मान्छे र पशुपंक्षीबिचको सुमधुर सम्बन्ध चाहन्थे !

तर

आफ्नो नाममा पशुपंक्षीको बली चढाएको

भगवानलाई फिटिक्कै मन परेको छैन ।

मान्छेको सृष्टि गर्दा बनाएथे केवल दुई जात

महिला र पुरुष !

फेरी कस्ले तौलियो ठुलो जात र सानो जात भनेर ?

कस्ले भर्याङ् हाल्यो

तल्लो जात र माथिल्लो जात छुट्याएर ?

को हो त्यो महात्मा ?

जस्ले सीमा तोक्यो मन्दिर पस्न हुने र नहुने जात भनेर ?

मान्छेले मान्छेलाईनै भेदभाव गरेको

भगवानलाई पटक्कै मन परेको छैन ।

बरु घण्टी बजाइदिउँ—

भगवान सबेरै उठ्नेछन्

शंख फुकीदिउँ—

भगवानका कान चनाखो हुनेछन्

र हाम्रा मागहरु ध्यान दिएर सुन्नेछन्

अगरबत्ती जलाईदिउँ—

भगवानलाई सुगन्ध मन पर्छ ।

भगवानले आकास देख्न नपाउनुभएको

कति भयो कति !

घाम अस्ताएको

चराहरु उडेको

झरना झरेको

झरी परेको नहेरेको युगौँ युग भयो ।

मन्दिर आउँने भक्तजनहरुको मन

मन्दिर बाहिरसमेत उत्तिकै पबित्र हुन्छ त ?

के मन्दिर आएर माग्नेजति सबै कुरा

भक्तहरुलाई आवश्यक छ त ?

भगवानलाई जाँच्न मन थियो !

तर कसरी ?

दिनभर भगवानलाई रुँघेर पुजारी बस्छन्

राती फलामे ढोकामा बडेमानको ताल्चा झुण्डाईदिन्छन्

त्यसैले

आजकल भगवान मान्छेहरुसंग आजित छन् ।

अँ साँच्ची !

मान्छेहरु भगवानका लागि

मन्दिर बनाउँछन् कि कारागार ??

प्रतिक्रिया
Loading...