लासेमी केरुङ

तिम्रो र मेरो
ईच्छा पत्रमा
तिमीलाई नै साँची राखेर
जिन्दगी बन्धक राखेकोछु !

गुराँश टिप्ने वहानामा
हिउँ फूल्ने पाखाभरी
कुदेकोछु- दौडेकोछु
एकसुरमा…. सिसिफसजस्तो

तिमी, उता पारि छौ
पलपल मायावी, रकेट्मा आउँछौ
मिमिकमेनजस्तै

म
कल्पनाको विमानमा उड्न थाल्छु
दिशाहीन-
धागो चुँडिएको चङ्गाजस्तो

लाग्छ, लट्टाई तिम्रै हातमा छ
त्यसैले,
तिम्रै रनवेमा
सेफ ल्याण्ड हुने इच्छा पनि
बेमौसमी भेलजस्तै उर्लिएकोछ

खै ! ककपिटमा तिमी छौ

जापान