लाख कोसिसमा
पिरतीको गहिरो सागरबाट
कठिनले भेटेर ल्याएको
साँच्चै अनमोल
हाम्रो मायाको चिनो हो यो समर्पण
तिमीमै समर्पित गरेको छु ।
सीसा सरी फुट्न नि सक्छ

जतन गर्नु ल !

पुष,माघको
चिसो सिरेटोमा कठाङ्ग्रिएर
फक्रनै भुलेको थियो,

साह्रै मुस्किलले
एक थुङ्गा फुलाएर ल्याएको छु,
हाम्रो मायाको चिनो हो यो फूल

तिमीमै समर्पित गरेको छु ।
हावाको एक झोक्काले
भुइमा झरेर च्यातिन नि सक्छ ।

जतन गर्नु ल !
अझै धेरै,
लामो छ यात्रा

बेस्सरी पिडादायी जीवन
तिनै दुखाइहरु माझ
मर्दै,बाज्दाको दोसादबाट
तिम्रै लागि भनेर
बल्ल तल्ल बचाएर ल्याएको छु,
हाम्रो मायाको चिनो हो यो ढुकढुकी
तिमीमै समर्पित गरेको छु ।
बल्दा बल्दै निभेको
दियो सरी निभ्न नि सक्छ ।
जतन गर्नु ल ।