छोडिसकेको चियाले निरन्तर पोलेको छ
भुटानीहरूले दिमाग भुटेको भुट्यै छ
सुन्दैछु कुन्नी एमसिसिले झुक्यायो अरे
यीबाहेक सब, ठीकठाक नै चलेको छ

कैले यति ओम्नीले ठेलेको ठेल्यै छ
कैले राष्ट्र खैरो रङले पेलेको पेल्यै छ
कैले पहेँलो धातुले ऐँठन पारेको छ
यीबाहेक सब, ठीकठाक नै चलेको छ

बाल मन्दिर, ललिताले खेदेको खेदैछ
उता शितलको रापको तापले पोलेकै छ
दशैँको झरी र जाजरकोटे कम्पले जेलेकै छ
यीबाहेक सब, ठीकठाक नै चलेको छ

उता सेता टावरले सपनामा लखेटेकै छ
राष्ट्र ऋणको मिटर चढेको चढ्यै छ
देश भ्रष्टाचार सूचीमा पहिलो हुने दौडमा छ
यीबाहेक सब, ठीकठाक नै चलेको छ ।