विज्ञान भन्छ
रङ्ग आँखामा हुन्छ
त्यसैले हामी देख्छौँ

भावना भन्छ
रङ्ग मायामा हुन्छ
र त
हृदयमा भेटिन्छ

चेतना भन्छ
रङ्ग नै हुँदैन
यो त केवल
समयको भ्रम हो

समय नै हो
जसले
जीवनमा रङ्ग भर्छ
जवानीमा रङ्ग भर्छ
ऋतुमा रङ्ग भर्छ
रात र दिनमा रङ्ग भर्छ

सूर्यले
दिनमा उज्यालो दिन्छ
चन्द्रले
अँध्यारो रातमा

समयले
दिनलाई सेतो रङ्ग दियो
र
रातलाई कालो रङ्ग दियो

समयले छेपारोलाई मात्र
रङ्ग फेर्न सिकाएन
मान्छेको नियतमा
रङ्ग भरिदियो

मान्छेको नियतले
रातलाई सेतो रङ्गको बनायो
र
दिनलाई कालो रङ्गको बनायो

सुन्दैछु,
मेरो देशमा
आज भोलि
सज्जनहरू
रातमा मात्र
विचरण गर्छन् रे
किनभने
दिनको उज्यालोमा
मनमा कालो पोतेकाहरू
व्यापार चलाउँछन् रे !

विडम्बना,
मेरो देशको शासन व्यवस्था
दिनमा नै सञ्चालन हुन्छ ।

एडमन्टन, क्यानडा
११६ औँ लक्ष्मी जयन्ती