म चोर रे डाका रे
लुट्न मात्र जानेको
निर्मम अभिहर्ता रे
पैसो मात्र देख्ने रौंचिरा रे
सिङ्गो देश खाने धमिरा रे
टुप्पोदेखि पैँतालासम्म
दुर्गणै दुर्गुणले भरिएको
मलाई काटेर ताछेर
खाल्टोमा पुरिनु पर्छ रे
ठीक छ, ओकलेर विष हुन्छ
तिम्रो भलो भने त्यही गर
गन्न त म पनि सक्थेँ
तिम्रा अनुहारका खतहरू
सक्दिनँ दुखाउन तिम्रो चित्त तर
मलाई माफ गर

आए होलान् मेरा जिजुबा
पराइ धर्तीबाट
म त यही माटोमा
जन्मे हुर्केको
सुखदुःख मिलन-बिछोड
तिमीसित नै साटेको
लडीबुडी खेल्दै
रुन हाँस्न तिमीसँगै जानेको
तिमीबाहेक आफन्त
अन्य कोही छैन कतै
गाली गर सत्तो सराप
ठीकै छ, हिलिमिली नगर
हरेक हेला सहर्ष स्वीकार्य छ
सक्दिनँ मान्न तिमीलाई पराइ तर
मलाई माफ गर

सिङ्गो समुदाय खत्तम
सिङ्गो जात खत्तम
सिङ्गो सम्प्रदाय खत्तम
सिङ्गो संस्कृति खत्तम
कुन्नी ! किन पलाए
कुण्ठा घाउ यस्ता
कुन्नी ! कसरी जुर्मुराए
वैरी भाव यस्ता
ठीक छ,
जे जे ठीक लाग्छ त्यही त्यही गर
इच्छाए जत्ति चीरहरण पहाड चढ्दै गर
जन्मथलो छोड्दे नभन तर
प्राण हरे हुन्छ बरु
जाँदिन अन्यत्र कतै
मलाई माफ गर ।