न काम गर्छ यहाँ घामले

न आराम गर्छ

अनगिन्ती अनावश्यक तामझामले

न उज्यालोले प्रष्ट छ समय

न टालेरै भएपनि स्पष्ट छ भविष्य

मलाई लाग्छ

ढुङ्गाबाट माटो पूरै गलेको छ

ढुङ्गाको बगैँचाभन्दा पर

माटोभित्र मोती फलेको छ

बाहिर बाहिर हाँसेर

भित्र भित्र जिन्दगी

प्रकाशको गतिमा जल्नुसम्म जलेको छ

जहाँ माटो हुँदैन

त्यहाँ जिउने बाटो हुँदैन

जिन्दगी एक्लै तर बेग्लै बेग्लै चलेको छ

पर सरेको जिन्दगी

घर नसरेको धेरै भएपछि

घर अँध्यारो लाग्छ

र पनि प्यारो लाग्छ

ए ! गोधुलीसाँझ

के गर्दैछस् हामीमाझ ?

मभित्रको अगेनुमा आगो बलेको छ

हटेर जा जिन्दगीबाट

हराएर जा हृदयबाट

मेरो भरोसाको भर्‍याङ

ढलेको छ कहिल्यै नउठ्नेगरी

त्यसैले

ए ! गोधुलीसाँझ

बिन्ती छ नबस हामीमाझ ।

सिगास -२, बैतडी