उषा शर्मा

अनुभूतिको ऐनामा

अल्झिएका

मेरा समयका चाउरीहरू

अहिले अल्छे भएर

पसारिरहन्छन्

घरभित्रकै चारकुनामा,

हतार, व्यस्तता र थकाइहरू

झोक्रिरहन्छन्

विगतको स्मृतिमा,

परिश्रम र पसिनाका आँखाहरू

छटपटाउँछन्

अतीतको सपनामा।

बिस्तारै बिस्तारै

मोवाइल स्कीनमै

टाँसिएको नयाँ युगमा

ठाँउ ठाँउमा

जन्मिरहेछन्

डिजिटल विरूवाहरू।

सोशल मीडियामा

रमेका नयाँ पिढ़ीका

सबै कुरा

वर्चुअल हुनु

साइनो-सम्बन्ध

प्रेमभाव र

सद्भानाको

सेल्फी मात्र हो,

जसको प्रत्येक क्लिकमा

भत्किन्छ

सम्वेदना र संस्कारको मुहान।

गान्तोक