तिमी सिधा जाऊ
तिमी माथि जाऊ
प्रगति गरेर
सफलताको शिखर चुम

तिम्रा अघिपछि
तिमीसँग
अरु कसैका अपेक्षाहरू छैनन्
तिमी स्वतन्त्र छौ
आफैँमा, अनि
अन्य सम्पूर्णसँग
तिमी तिम्रो मनले
सोच्न सक्छौ
तिमी तिम्रो विचारले
हिँड्न सक्छौ
तिमी तिम्रो स्वतन्त्रताको
भरपुर उपयोग गर्न सक्छौ
स्वतन्त्रताका साथ

तिमीसँग कर्तव्यका
भारीहरू छैनन्
तिमीसँग दायित्वका
पहाडहरू छैनन्

तिमी तिम्रो जीवन
तिम्रै तरिकाले
बाँच्न सक्छौ

आफ्नो जीवनका जगहरू
आफ्नो जीवनका पर्खालहरू
तिमी आफैँ
आफ्नो तरिकाले राख्न सक्छौ

तिम्रो बारीको कुनै साँध छैन
तिम्रो बारी तिम्रै ढंगले
तिमी आफैँ जोत्न सक्छौ
अन्नबाली लगाउन सक्छौ

तिमी तिम्रो जीवनको गोरेटो
आफैँ कोर्न सक्छौ
तिमी तिम्रो जीवनको
सफलताका सिँढीहरू
नापीनापी चढ्न सक्छौ

तिमी तिम्रो जीवन
तिम्रो डिजाइनमा
तिमी आफैँ निर्माण गर्न सक्छौ
तिम्रो स्वतन्त्रताको
पूर्ण उपयोग गरेर ।

बस्टन, अमेरिका