पोहोर जस्तै

यो दशैंमा पनि गाँउ फर्कनेको लर्को

ऋणको बर्को ओढेर विमानस्थलमा जहाज कुर्दै थियो

पिङको लठारो बाट्ने लाठेहरू

लिङ्गो गाड्न सबेरै बाँस काटनेहरू

आज विदेशमा बेल्चा हान्दै होलान्

मासुभात र दहीचिउरामा रमाउनेहरू

‘खबुस’ र बेस्वाद खानामा बानी पर्दै होलान्

पोहोर जस्तै

यसपालि पनि बैंकहरूले नयाँ नोट साटेको खबर आयो

खुद्रा नोट साट्न, नयाँ नोट साट्न

ठूलो अनि पुरानो नोट कतै बाँडेको सुनिएन

सिंहदरबार र बालुवाटारले बाँड्ने

दशैंखर्चको हिसाब आउनै बाँकी छ

पोहोर जस्तै

यसपालि नि दशैंमा दशैं मान्न नसक्नेहरू

अनि वर्षैभरि साँझबिहान दशैं मनाउनेहरू

एकै ठाँउमा बसेर, सँगसँगै नाचेर

दशैं मनाउने गरी दशैं आएन ।

गौरादह,  झापा

हालः कतार