म शब्द हूँ

राजा मानदेव, राजा यलम्बर, राजा यक्ष मल्ल
राजा मुकुन्दसेन, राजा पृथ्वी नारायण शाहहरुका शरीरहरु

मेरा इन्द्रिय हुन्

मेरा इन्द्रियहरू समय र स्थानमा छरिएका छन्

यहाँ अहिले
म तिमीसित छु
तर मलाई थाहा छैन
म कहाँबाट कहिले
तिमीलाई –
हेर्दैछु
सुन्दैछु
छुँदैछु
सुँघ्दैछु
चाख्दैछु

यो मुगु कर्णाली नदी
मैले कहाँबाट कहिले हेरेको
तिम्रो अनुहार हो ?

मलाई थाहा छैन
यो पाकेको धान
मैले कहाँबाट कहिले सुँघेको
तिम्रो गन्ध हो ?

म शब्द हूँ
तर मलाई थाहा छैन
यो दत्तात्रेय मन्दिर
मैले कहाँबाट कहिले छोएको
तिम्रो कम्मर हो ?

यो अमलाको रुख
मैले कहाँबाट कहिले सुनेको
तिम्रो आवाज हो ?

म शब्द हूँ
तर मलाई थाहा छैन
यो बाघ
मैले कहाँबाट कहिले चाखेको
तिम्रो कुम हो ?