जय होस् महासय हजुरहरू सबैलाई !
दिनभरको मजदुरीले चुलो बाल्न नपुगे के भो ?
अरे, घाममा बोरा बोक्दा ढले पनि केही हुन्न गरिब,
पाकिरहेकै छन् त अनेकौं व्यञ्जन घरमा यहाँको,
आएकै छ मार्सी चामल र ग्यास फ्रीमा, फिक्री छैन,
गरिरहनुभएकै छ करोडौँको हिसाब, ढोका बन्द गरी ।

सुनुहोस् न, सिलिन्डर अलि सस्तो पो भयो कि !
अझ चामलको त के कुरा गर्नु ? धेरै सस्तो छ ।
बढाउनु पर्छ है अझै, चाडपर्व जो आइरहेका छन्,
ठग्नु पर्छ नि जनताहरू, मौका यही हो ।

कुटिरहन पनि दिनुपर्छ ज्यान बचाउने डाक्टरहरूलाई
तर छुटाउनुपर्छ ज्यान मारेर जन्मकैद पाएकाहरूलाई ।
बजेट त पुग्दैन होला शिक्षा दिने शिक्षकलाई सुविधा दिन,
ओहो ! अझ प्रोफेसरलाई त देशबाटै पो लखेट्ने कि !
व्यापार-व्यवसाय डुबेर सुसाइड गरे पनि गरिरहुन्,
आगोमा दनदनी जिउँदै बले पनि बलिरहुन्, के मतलब ?
बाढीले घरबार बगाएर भोकै मरे पनि मरिरहुन् जनता,
बस्, हजुरहरूले अरबौँ पैसा जम्मा गरिहाल्नु पर्छ,
किनकि, घरिघरि मन्त्री हुन नपाइने पनि त हुनसक्छ !

उद्योग कलकारखाना होइन महल बनाउनुस् राज गर्न,
आफ्नो खर्चमा विदेश जान गाह्रो पर्ला पछि,
मौका यही हो, अहिलै घुम्नुहोस् सयौँ देश मज्जाले,
रगतपसिना बगाएर तिरेको हाम्रो करबाट आन्नदले ।
टेक्कापट्टा मिलाउनुहोस्, कमिसन खानुहोस्,
‘हस् हजुर’ भन्दै साइन गरी लिनुहोस् डलर ब्रिफकेसमा,
अनि जम्मा गर्नुहोस् अरबौँ रकम स्वीस बैङ्कमा,
कम्तिमा तीनचार वर्ष मन्त्री हुँदा
तीन पुस्तालाई त पुगोस् मोज गर्न – होइन र हजुर ?

उता शान्ति डायलसिस गर्न कुर्दाकुर्दै ढलिछन्
मुटुको अपरेसन गर्ने मिति गन्दागन्दै
रामलालले प्राण त्यागी सकेछन्,
उफ् !
हरिले क्यान्सरको उपचार गर्न बेचेछन् घरखेत,
बिनाले सुत्केरी बेथामै चिम्लिछन् आफ्नै चार आँखा,
मरी रहुन् न गरिब, के भो ?
उपचार गर्न खर्च न पुगेर के भो ?
तर हजुरचाहिँ पेट दुख्नासाथ चार्टरमा विदेश गइहाल्नु पर्छ है !
फेरि ‘देश खान’ स्वास्थले नदेला भन्ने चिन्ता भइरहन्छ ।

केही हुन्न विद्यार्थीहरू तुइनमा झुन्डिएर स्कुल गए,
अनि बेलुका खोलाले बगाएर घर नफर्के पनि ।
बुबाआमा बियोगमा छटपटिएर तडपिए पनि केही हुन्न,
तपाईंका छोराछोरीले पढेकै छन् डाक्टरी अमेरिकामा,
पढेर इन्जिनियरिङ पाइसके रे पिआर अस्ट्रेलियामा ।
अरे, छोड्नुहोस् ! खाडीमा रगतपसिना बगाउने,
दुई छाक खान दिनभर गिट्टी कुट्नेहरूका कुरा ।

लुकाउनु पर्छ पीडितले नाम ‘इज्जत’ जान्छ भनेर,
सम्मान, पद र प्रतिष्ठा दिलाउनु पर्छ अपराधीलाई,
यसरी नै हो राख्ने नाम इतिहासका पनाहरूमा,
खोलेर स्याम्पियन, दिनुहोस् है ग्रयाण्ड पार्टी रिसोर्टमा,
जय होस् महासय, हजुरहरू सबैको जय होस् !!!