कम्युनिष्ट छन्, कम्युनिजम छैन
समाजवादी छन्, समाजवाद छैन
पुँजीवादी छन्, पुँजीवाद छैन
राष्ट्रवादी छन, राष्ट्रवाद छैन

व्यवस्थापिका छन्, व्यवस्था छैन
कार्यपालिका छन्, कार्यक्रम छैन
न्यापालिका छन्, न्याय छैन
कर्मचारी छन्, कर्मकाण्ड छैन

कांग्रेसी छन्, कांग्रेस छैन
माओवादी छन्, माओवाद छैन
जबजवादी छन्, जबज छैन
राजावादी छन्, राजा छैन

नेता छन्, नीति छैन
सिद्धान्त छन्, व्यवहार छैन
दासदासी छन्, कार्यकर्ता छैन
जनता छन्, जनार्दन छैन

भ्रष्टाचार छ, भ्रष्टाचारी छैनन्
दूराचार छ, दूराचारी छैनन्
बलात्कार छ, बलात्कारी छैनन्
सुरक्षाकर्मी छन्, सुरक्षा छैन

कवि छन्, कवित्व छैन
पत्रकार छन्, पत्रकारिता छैन
मजदूर छन्, उद्योग छैन
किसान छन्, किसानी छैन

उद्योगी छन्, उद्योग छैन
मजदूर छन्, मजदूरी छैन
खेत छ, खाद्यान्न छैन
सुन छ, सुनखानी छैन

विद्यालय छन्, विद्या छैन
विश्वविद्यालय छन्, विद्यार्थी छैनन्
गीत छ, संगीत छैन
विवरण छ, कैफियत छैन ।